تیرۆرکردنی مەشعەل تەمۆ هەڵگری پەیامێکە
تیرۆرکردنی تێکۆشەری کورد مەشعەل تەمۆ، گوتهبێژی ”رهوتی موستهقبهل“ و یەکێک لە چالاكوانی سیاسی كوردی رۆژاوای کوردستان، ناوبراو بە کوردستانی سووریە، پاشنیوەڕۆی ڕۆژی هەینی ٧/١٠/٢٠١١ رێکەوتی ١٥ رەزبەر ١٣٩٠، پەیامی داگیرکەرانە کە شێوەی تیرۆرکردن دەبەنە ئاستی سەرەوەی ئاجێندای سیاسییان.
تا هەفتەی ڕابردوو دەوڵەتی سووریە بەتایبەتی هێرشی نەدەکردە سەر بەشی کوردستان لە سووریە. دەوڵەتی سووریە کە باش لە سیاسەتی ٦٣ ساڵەی خۆی لە ڕۆژئاوای کوردستان ئاگادارە، کە لە درێژایی ئەو ماوەیەدا وەکو هاووڵاتی نکۆڵیی لە هەبوونی کورد دەکات و بە ڕەسمی نازناوی ”میوانی خاکی عەرەب“ ـی بەسەردا سەپاندوون، کە لە سەر ئاستی ڕۆژانە ڕایگواستوون بۆ ناوچەی عەرەبنشین و عەرەبی هاوردەی هێناوەتە جێیان، کە لە ژێر فشاری خراپکردنی باری ئابوورییدا بە ملیۆن کوردی کردووە بە کرێکاریی وەرزیی ناوچە عەرەبنشینەکان، کە بە ڕەسمیی هانی عەرەب دەدات کە ژنی کورد مارە بکەن، دەیزانی کە لەم کاتەدا فشاری زیاتری سەربازیی بۆ سەر کوردستان، کە خۆی هەمیشە ناوجەیەکی ناڕاستەوخۆ میلیتاریزە بووە، دەبێتە مایەی پڕبوون و بەسەردا ڕژانی جامی کورد.
لە لایەکی دیکەوە خەڵکی کوردستان لە هەر چوار پارچەی کوردستان بە دەستی داگیرکەر و دڕندەی تورکیاوە دەناڵێنێت. تورکیا ئەو دەوڵەتە داگیرکەرەیە کە لە مێژووی خۆیدا، بە ئێستایشەوە کە قازانجی ملیاردەها دۆلار لە کوردستان دەکات، کۆسپ دەخاتە بەردەم کاری سەربەخۆیی لە باشووری کوردستان، دووبەرەکیی و ناتەبایی دەچێنێت و تورکەمان و عەرەب ڕێک دەخات و بە گژ کوردیان دا دەکات. هەمان دەوڵەت، ئەگەرچی لەگەڵ ئێران کۆمەڵێک کێشەی گەورەی مێژووریی و ئابووریی و ئایدیۆلۆژیی هەیە، هاوکات دژ بە تێکۆشەرانی کوردستانیی لەوپەڕی هاوئاهەنگیی سیاسیی و سەربازییدایە. لە شەش مانگی رابردوودا هێزی سەربازیی ئێران و تورکیا دووقۆڵی وەکو یەک سوپا هێرشیان بردووەتە سەر کوردستان.
دەوڵەتی تورکیا لە سەرەتای دەستپێکردنی ناڕەزاییەکان لە سووریا کارتی فشاری دژ بە دونیای خۆرئاوا بەو شێوەیە بە کار بردووە کە نابێت زەبر دژ بە حکومەتی سووریا لە شێوەی لیبیا بە کار ببردرێت، کە دەبێت گارانتی یەکایەتی خاکی سووریە بکردرێت و وەکو ”ئێراق“ بەش نەکرێت. هەروەها ئۆپۆزیسیۆنی سووریەی داوەتی تورکیە کردووە و کارهاسانیی بەو مەرجە بۆ کردوون کە نەهێڵن کوردەکان لە کۆنفەرانسەکانی ئۆپۆزیسیۆنی سووریەدا بەشدار بن.
ئێمە هەر لە سەرەتاوە رامانگەیاند کە ئۆپۆزیسیۆنی سووریە لە ژێر فشاری تورکیە و نەخشەڕێگای تورکەیدا لە خودی حوکمەتی بەشارئەسەد دژ بە پرسی کورد کۆنەپەرستترە. ئێستایش دڵنیاین کە بەو زووانە بەرەیەکی کۆنەپەرست و دڕندە دژ بە پرسی کوردستان لە سووریە لە ژێر رابەرایەتی تورکیادا ڕێک دەخردرێت.
گەمارۆی گەورەی سەربازیی ئەم دواییەی تورکیا بۆ سەر سنووری سووریە کە هەروەها خاکی کوردستانە دەبێت لە چوارچێوەیەدا ببینرێت. لەبەرئەوە ئێمە وەکو کۆمەڵە – پارتی سۆسیالدیموکراتی کوردستان لە تیرۆرکردنی مەشعەل تەمۆ دا هەر بە تەنیا حکومەتی سووریە بە تاوانبار نازانین، بەڵکو هەروەها پێمان وایە کە دەشێت و هۆگەلی زۆر هەن کە ئەم کارە ئیستیخبارات و میت و ئەرگەنەکۆنی تورکیای لە پشتەوە بێت. تورکەکان لەو ڕاستییە زۆر دەترسێن کە هەل و دەرفەت لە بەردەستدایە کە کوردی ئەو بەشە دەتوانن، بە شێوەی باشوور، ڕوو بە ئازادیی بڕۆن. ئەمە بە مانای کردنەوەی دەرگایەکی نوێیە لە سەر گەلی کورد لە باکووری کوردستان کە لە ژێر سیاسەتی سەد ساڵەی نکۆڵیکردن و ناشارستانیی تورکیەدا دەژین.
ئێمە بە توندیی ئیدانەی تیرۆرکردنی تێکۆشەر مەشعەل تەمۆ دەکەین و داوا لە سەرجەم هێزی سەربەخۆییخواز و کوردستانیی هەموو بەشەکانی کوردستان دەکەین کە لە سەر خەباتی کوردستانیبوون و سەربەخۆییخوازیی بەردەوام بن. ئەوە تەنها وەڵامێکی دروستە دژ بە داگیرکەران.
١٦ / رەزبەر/ ٢٧١١
٨ / ئۆکتۆبەر/ ٢٠١١
