سەربەخۆیی: مافێکی رەوا و داوایەکی ڕیئالیستیی و ئومیدێکی بەهاتە
دڵسۆزانی خەباتی ئازادیخوازیی خەڵکی کوردستان
دۆستان و یاران دەزانن کە خەباتی سەخت و خوێناوی و پڕ زیانی ماڵیی و گیانی لە ڕۆژهەڵاتی کوردستان سەرەڕای هەموو هەوڵ و تێکۆشانێک و سەرەڕای هەموو لەبەرچاوگرتنێکی خواستی دوژمن بۆ داوانەکردنی سەربەخۆیی و لە بریتی ئەوە داواکردنی خودموختاریی و ٣ خاڵ و ٨ خاڵ و ١٤ خاڵ، بە سەرکەوتن نەگەیشتووە، که ئەوە ڕاستییەکی تاڵە.
دەنگی دەهۆڵ لە دوورەوە خۆشە. کەس نازانێت باس لە چ جۆرە فیدرالیزمێک دەکرێت و ئایینامە و ڕوونکردنەوەی کامەیە و لە کوێ بڵاوکراوەتەوە و دەست کێ لە خەڵکی کوردستان گەیشتووە. دووبارە خەڵکی تا سەر گەروو هاتووی کورد ماسیی لە چۆمدا پێ دەفرۆشرێتەوە.
ئەزموونی لانی کەم لە ٧٠ ساڵی ڕابردوو لە سەر جۆری لەو شێوە لە داوای چارەسەر، ئەگەر قسە لەسەر زەرەرمەندبوونیش نەبێت، لەو پەڕیدا ناسەرکەوتوو بووە.
خەڵکی کوردستان دەزانن کە خەباتکارانی سیاسی لە ٣ لایەن و ٤ لایەن لە حیزب و ڕێکخراوەدا خولاسە نابێتەوە و بەڵکو بە دەیانن. زۆربوونی ژمارەی پارت و ڕێکخراوە، بە مەرجێک سەرڕاستیی و دڵسۆزیی تێدا بێت، قازانجی زۆرە و زەرەری کەم.
لەو بارەوە کۆمەڵە – پارتی سۆسیالدیموکراتی کوردستان، هەروەکو هاوبیران و لایەنگرانی بە سەدان هەزاری بیری سەربەخۆیی، بە پشتبەستن بە سەدان لە خەباتی ئازادیخوازیی سەرکەوتوو لە جیهاندا، بە پشتبەستن بە جاڕنامەی نێونەتەوەیی مافی مرۆڤ، بە پشتبەستن بە مافی نەتەوەکان بۆ بڕیاردان لە سەر چارەنووسی خۆیان، بە پشتبەستن بە خەباتی ماندوونەناسانەی خەڵکی کوردستان و بە تێگەیشتن لە دڕندەیی و لە ناشارستانیی داگیرکاران، دڵنیاین کە خەبات بۆ سەربەخۆیی بە هیچ شێوەیەک لەو قوربانیە زیاتر لەسەر خەڵکی کوردستان ناکەوێت کە تا ئێشتا کەوتووە و دەکەوێت.
داگیرکەر، جا هەر حکومەتێک نوێنەری بووبێت، نە هەر وەڵامی بە داخوازیی ٣ خاڵەی کوردیش نەداوەتەوە و بەڵکو تەنانەت تیمی تیرۆریستیی و بکوژی بۆ دانیشتنی ئاشتیانە لەگەڵ لایەنی کورددا ناردووە.
خەباتی ئازادیخوازیی کورد بە تەنیا لە پێوەندی لەگەڵ حکومەتی ئیسلامییدا خولاسە نەبووە و لە ئاییندەشدا نابێتەوە، بەڵکو دەگەڕێتەوە بۆ دوورێک لە مێژووی دەستەڵاتدارانی ئێران بە حوکمی ڕەزاشا و سەڵتەنەتتەڵەب و هەروەها لە بێ هەڵوێستی سەوز و گشت جۆرەکانی ئۆپۆزیسیۆنی دیکەی سەر بە ”ایران یک ملت یک کیشور“.
پێویست بە گارەنتیەک ناکات ئێمە بیدەین کە هیچ کاتێک داگیرکەر لەوە باشتر نابێت کە تا ئێستا هەبووە و دیتوومانە. ئەمە ڕاستییەک نییە کە تەنها ڕیائلیتیەی کوردستان بێت، بەڵکو تایبەتمەندیی مێژووی داگیرکارییە.
هاوکات دەهێنینەوە بیری هەمووان کە خەبات بۆ سەربەخۆیی، خەون و خەیاڵ و شەڕفرۆشتن بە پەروانەکانی ئاشی با نییە وەکو تا ئێستا ڕۆڵەی زیانلێکەوتووی کوردی پێ گۆش دەکرێت، بەڵکو خەباتێکە کە هەندێک پێشمەرجی گرینگ دادەسەپێنێت، وەکو باوەڕبەخۆبوون و پشتبەخۆبەستن و دڵسۆزیی و تەبایی و قبوڵکردنی پلورالیزم و کاری هاوبەش. ئەوانە پێشمەرجگەلێکن کە دەبێت هەر تاکە سەربەخۆیخوازێکی کوردستانیی بە خوێنی خۆی بیپارێزێت. ئێمە لە خەباتی خۆماندا دڵنیاین کە کوردستان بە زۆرەوە خاوەن کچان و کوڕانی لێهاتوو و کارزان و تێکۆشەرە کە دەتوانن خەباتی سەربەخۆیی بە ئامانج بگەیەنن.
با دۆستان و دوژمنان بزانن کە ئێمە هەر لە سەرەتاوە بۆ ڕەواندنەوەی هەموو جۆرە گرژیی و نیگەرانییەکی سیاسیی، داوای ڕیفەراندۆمی سیاسیمان کردووە، نەک دامەزراندنی دەوڵەت. ئەویش بەو مانایەی کە خەڵکی کوردستان لە هەڵبژاردنێکی ئازاددا، دوور لە فشار و گوشار، بڕیار لە سەر چارەنووسی خۆیان بدەن.
هەموو لایەنێکی دیکە، بە ئەوانەیشەوە کە بە دزیی و لەژێر پەردەوە داوای دانیشتنی زۆر ئاست نزم لە دەوڵەتی داگیرکەر دەکەن، دەتوانن و بۆیان دەبێت جاڕ و بانگەواز بۆ شێوەچارەسەری خۆیان بکەن. فەزای ڕیفەراندۆم هەلی بەشداربوون بۆ هەموو لایەک، تەنانەت بۆ تاکەکس و گرووپیش، دەڕەخسێنێت، بەڵام لە هەرە کۆتاییدا خەڵکی کوردستانە کە ئەو چارەسەرە سیاسییە هەڵدەبژێرێت کە بەلایەوە پەسەندە. هیچ لایەنێک نابێت هێندە بێڕێزیی بە خەڵکی کوردستان بنووێنێت کە مافی وای پێ بە ڕەوا نەبینێت.
ئەوە داوای ئێمەیە که لە پرینسیپی سەربەخۆخوازیی باش تێ دەگەین و لە سەر ئەو بناخەیە خەبات بۆ فەراهەمکردنی زەمینەی لەبار و دروست بۆ ڕیفەراندۆم لە ڕۆژهەڵاتی کوردستان دەکەین. بەو شێوەیە مافی دوا بڕیار، بڕیاری دیاریکردنی چارەنووس، دەدەین بە خەڵکی کوردستان.
بۆ ئەوەی ڕێگا لە هەموو جۆرە شێوەیەک لە خراپ لەیەک تێگەیشتن بگرین لێرەدا ئەوەیش دەڵێین کە ئێمە بە پرینسیپ دژ بە کۆبوونەوە و دیالۆگ لەگەڵ هیچ لایەنێکی ئەو دیو سەنگەری کوردستانەوە نیین، چونکە لە لایەکەوە بڕووامان بە دیالۆگ و چارەسەری سیاسیی و شارستانیانەی دوور لە زەبر و زەبرگیرییە، و لە لایەکی دیکەوە شتێکمان نییە پەنهان ڕایبگرین. ڕای خۆمان بە سەربەرزیی و شانازییەوە لە هەموو هەلێکدا بە یاران و نەیار ان دەگەیەنین.
لەو بارەوە هەموو جۆرە دانیشتنێک کە تیایدا وەکو سەردەمی ئاغاو شێخایەتیی، نووشتەی پێچراوە لە ژووری داخراو و لە فەزای پەنهاندا، بەتایبەتی کە مۆری ”تاکەچارەسەر“ ـی لێ بدرێت، لەلای ئێمەوە قابیلی قبوڵ نییە و نابێت.
لەگەڵ هەموو ڕێزێکمان بۆ هەر خەباتگێرێکی دڵسۆزی کوردستان دەبێت ئەوە بڵێین کە ئێمە ههوڵی به ئهنقهستی فرە لایهنی جیاواز لە نوێنەرانی داگیرکەرمان دیتووە، به تایبهتی پان ئێرانیستهکان، که چهندبهرهکایهتی بخهنه ناو کوردەوه و کڵاوێکی سیاسیی دیکە وەسەر کورد بنێن. بهتایبهتی ئێستا کە دڵسۆزانی ”ایران زمین“ دەزانن کە نەتەوەبندەستەکانی ئێران بە قازانجی خۆیان هۆشیار دەبنەوە و وەخەبەر دێن.
هاووڵاتیان، کوردستانیانی دڵسۆز
هەوڵدان بۆ سەربەخۆیی هەر بە تەنها مافی نەتەوە نییە، بەڵکو مافی بوونەوەرە بۆ بەردەوامبوون لە سەر ژیان و پاراستنی خەسڵەت و تایبەتمەندیی خۆی. ئەوە مافی ئێمەیە، و ئێمە دەبێت مافمان بۆ ژیانێکی ئازاد و سەربڵندانە هەبێت و هێز و توانامان هێندە زۆرە کە سەربەرزانە و بە شانازییەوە ئەو ڕێگایە بپێوین و سەرئەنجام سەر دەکەوین.
هاوڕێیان و دڵسۆزان،
سەربەخۆیی ئومێدێکی بەهاتە هیچ هێزێک نییە بتوانێت بەری پێ بگرێت.
تۆیش وەرە ڕیزی خەباتی ئازادیخوازیی سەربەخۆییخوازییەوە و داوای ڕیفەراندۆم بکە، ڕیفەراندۆم شێوەیەکی شارستانییە کە لە ڕێگای دیالۆگ و گفتوگۆ و خواستی دڵخوازییەوە مرۆڤ دەتوانێت داوای خۆی بخاتە بەردەست.
ئەوە داگیرکەرە کە لە خواستی تۆ بۆ سەربڵندیی و ئازادیی حاڵی نابێت و مل بە دیالۆگ و خواستی ئازاد نادات.
پشتبەخۆئەستوور و باوەڕبەخۆ بێت خەڵکی کوردستان!
سەرکەوتوو بێت بزووتنەوەی رزگاریخوازانەمان!
کۆمهڵه ــ پارتی سوسیالدیموکراتی کوردستان
٢٩/٦/٢٠١١
